ქართული ენის დღისადმი მიძღვნილი ღონისძიება თბილისის მუნიციპალიტეტის საკრებულოში

თბილისის საკრებულოში განათლებისა და კულტურის კომისიის ინიციატივით, სახელმწიფო ენის დეპარტამენტთან, ხელნაწერთა ეროვნულ ცენტრთან და საქართველოს პარლამენტის ეროვნულ ბიბლიოთეკასთან ერთად, ქართული ენის დღისადმი მიძღვნილი ღონისძიება გაიმართა. თამარ მეფის სახელობის დარბაზში “დედა ენის” სხვადასხვა გამოცემა, მათ შორის, პერიოდიკის მიხედვით, იაკობ გოგებაშვილის სისტემაზე აგებული სხვადასხვა ეპოქის გავლენით ინტერპრეტირებული წიგნები გამოიფინა. ექსპოზიციაზე ასევე წარმოდგენილი იყო ხელნაწერთა ეროვნული ცენტრის მიერ შექმნილი პოსტერები, რომელზეც იაკობ გოგებაშვილის "დედა ენის" შექმნის, დამუშავებისა და საბოლოო რედაქტირების პროცესია ასახული. ღონისძიებაზე სიტყვით გამოვიდნენ სახელმწიფო ენის დეპარტამენტის თავმჯდომარე გიორგი ალიბეგაშვილი, თბილისის საკრებულოს თავმჯდომარის მრჩეველი განათლების და კულტურის საკითხებში მარიკა დარჩია, თანამედროვე „დედა ენის“ ავტორები ნინო გორდელაძე და გვანცა ჩხენკელი, ფილოლოგი და მწერალი გია მურღულია, „ტელესკოლის“ წამყვანი, ქართული ენისა და ლიტერატურის მასწავლებელი რუსუდან აბრამიძე, ენათმეცნიერი გიორგი გოგოლაშვილი და ფილოლოგიის მეცნიერებათა დოქტორი თემურ ჯაგოდნიშვილი.